原创 薛理勇 海上梦叠
勒我个小辰光，大家侪拿汽水叫做搭仔写做“荷兰水”个。不过，到现在还呒没啥人好搞得清爽，汽水为啥体要叫“荷兰水”。
曾经读到过一篇文章，讲“荷兰水”是荷兰生产个汽水，输入东南亚一带之后拨叫做“亚逸勃兰达”，就是“荷兰水”个意思。后首来，“荷兰水”通过东南亚传到了中国，就拨叫做“荷兰水”了。也有人讲，“荷兰水”个香味道是薄荷，所以拨叫做“荷兰水”。搿也有点忒想当然了。
清朝个吴语小说《海上花列传》第四十三回里讲：“风水先生指点侧首一座洋房，讲是外国酒店，可以勾留暂坐。秀姐、云甫听了，相与扶掖前往。维时皓皓秋阳，天气无殊三伏，玉甫本为炎热所致，即进洋房，脱下夹衫，已凉快许多，再吃点荷兰水，自然清爽无事。” 清末出版个《沪江商业市景词·荷兰水》里讲：“荷兰冰水最清凉，夏日炎炎竞爱尝。中有柠檬收敛物，涤烦祛秽代琼浆。”看来，一百多年前头，有人就人为搿种汽水是荷兰个舶来品，所以叫做“荷兰水”。更加早个记录是葛元熙1876 年出版个《沪游杂记》，里向讲：“夏令有荷兰水，柠檬水，系机器灌水与汽入于瓶中，开时，其塞爆出，慎防弹中面目。随到随饮，可解散暑气”。
正广和洋行勒1864年勒英国创办，勿久之后勒上海设立了中国总号，主要经营酒类、餐用矿泉水，并且代理经销荷兰汽水。于是，就拨叫做“荷兰水”，主要提供拨西餐馆搭仔邪气有名个老德记药房、屈臣氏大药房等零售。1893年，正广和洋行勒上海现在个长治路搭仔大名路转角角子搿个地方创办了“上海泌乐水厂”，生产饮用蒸馏水搭仔汽水，搿是中国出现个第一只汽水厂。后来，曾经一度搬迁到提篮桥茂海路，就是现在个海门路，再后来又搬迁到了韬朋路，就是现在个通北路400号，搿个，就是上海正广和汽水厂个前身……不过，现在个“正广和”勒卖大桶个净水搭仔“盐汽水”了。以后，老德记药房搭屈臣氏大药房相继勒勒四川北路创办汽水厂，其他汽水厂那，也相继建立了，上海有交关汽水厂拨称作“荷兰水厂”。于是，“荷兰水”就成为了汽水个统称。当然，生产荷兰水个厂多了，葛末，“荷兰水”个价钿也就便宜了，成为了平民化个商品。作者：薛理勇讲述：冯 蓉
来源：夜光杯
作者：薛理勇
沪语改写：冯济民
讲述：冯 蓉
文字修正：丁迪蒙
原标题：《汽水曾叫“荷兰水”》
阅读原文